IPL 2026 : पॉइंट्स टेबलमध्ये उलथापालथ ६ संघांची प्लेऑफची आशा जिवंत, ४ संघ जवळपास बाहेर.

आयपीएल 2026 मधील प्लेऑफचं चित्र आता खूपच रोचक बनलं आहे. चेन्नई सुपर किंग्जने दिल्ल्ली कॅपिटल्सवर केलेल्या महत्त्वाच्या विजयामुळे पॉइंट्स टेबलचा सगळा हिशोब बदलताना दिसतो आहे. काही संघांसाठी पुढची दारे उघडली आहेत, तर चार दिग्गजांसाठी हा हंगाम संपल्यासारखी स्थिती निर्माण झाली आहे. चेन्नई सुपर किंग्जने आणखी एक सामना जिंकत स्वतःला पुन्हा प्लेऑफच्या रेसमध्ये घट्ट पकडलं आहे. दुसरीकडे दिल्ल्ली कॅपिटल्सला पराभवामुळे मोठा धक्का बसला असून त्यांचे गणित आता फार क्लिष्ट झालं आहे.

सध्या पंजाब किंग्ज टेबलवर अव्वल स्थानी असून त्यांच्या नावावर १३ गुण आहेत, पण अजून त्यांनी अधिकृतरीत्या प्लेऑफ गाठलेले नाहीत. १६ गुणांचा टप्पा गाठण्यासाठी पंजाबला अजून किमान दोन विजयांची गरज आहे. आरसीबी, सनरायझर्स हैदराबाद, राजस्थान रॉयल्स आणि गुजरात टायटन्स हे सर्व १२–१२ गुणांवर आहेत आणि या चारही संघांसाठी पुढचा प्रत्येक सामना ‘करो या मरो’सारखा ठरणार आहे.

चेन्नई सुपर किंग्जचे १० गुण झाले आहेत आणि त्यांच्या हाती अजून चार सामने शिल्लक आहेत. या चारपैकी किमान तीन सामने जिंकले तरच सीएसकेची स्थिती मजबूत होईल, अन्यथा शेवटच्या क्षणी चित्र बदलण्याची शक्यताही नाकारता येत नाही. दिल्ल्ली कॅपिटल्ससमोर तर आता जवळपास अशक्य असं समीकरण आहे – उरलेले चारही सामने जिंकले तरच त्यांना प्लेऑफचं स्वप्न जिवंत ठेवता येईल.

कोणते संघ जवळपास बाहेर?

कोलकाता नाईट रायडर्सकडे फक्त ७ गुण असल्याने त्यांचा प्लेऑफचा प्रवास प्रत्यक्षात इथेच थांबलाय असं मानलं जात आहे. मुंबई इंडियन्स उरलेले चारही सामने जिंकले तरी ते जास्तीत जास्त १४ गुणांवर पोहोचू शकतील आणि या हंगामात १४ गुण प्लेऑफसाठी पुरतील की नाही, याबाबत मोठी शंका आहे. लखनौ सुपर जायंट्स सुद्धा घसरत्या फॉर्ममुळे मागे पडले असून डीसी, केकेआर, एमआय आणि एलएसजी – या चार संघांसाठी प्लेऑफची दारे जवळपास बंद झाल्याचं चित्र आहे.

६ संघांची आशा अजून जिवंत

या परिस्थितीत ज्या सहा संघांसाठी प्लेऑफची दारे अजूनही खुली मानली जात आहेत, ते म्हणजे:

• पंजाब किंग्ज

• रॉयल चॅलेंजर्स बेंगळुरू

• सनरायझर्स हैदराबाद

• राजस्थान रॉयल्स

• गुजरात टायटन्स

• चेन्नई सुपर किंग्ज

आगामी १६–१७ दिवसांत होणाऱ्या लीग सामन्यांमधूनच या सहा संघांपैकी अंतिम चार कोण, हे ठरणार आहे आणि याच कारणामुळे पुढचा प्रत्येक सामना चाहत्यांसाठीही ‘हाय व्होल्टेज’ ठरणार आहे.

तुमच्या मते या सहा संघांमधून कोणते चार संघ प्लेऑफमध्ये धडक मारतील? तुमचा टॉप-४ कॉम्बिनेशन आम्हाला कमेंटमध्ये नक्की लिहा आणि आयपीएल 2026 मधील प्रत्येक अपडेटसाठी ग्रामराज्य सोबत जोडलेले रहा.