Now, J.J. and GMC Hospitals in Mumbai will be re-examined for the disability of Pune zp teachers :- ... आता मुंबईतील जे.जे. व जी.एम.सी. रुग्णालयात होणार शिक्षकांच्या दिव्यंगत्वाची फेरतपासणी!

डॉ. गजेंद्र बडे : ग्रामराज्य वृत्तसेवा 

पुणे, दि. ९ जुलै २०२५ :-  पुणे जिल्हा परिषदेतील सर्वच दिव्यांग शिक्षकांच्या दिव्यंगत्वाची फेरपडताळणी करण्यास ससून रुग्णालयाने नकार दिल्याने या सर्व दिव्यांग शिक्षकांना आता आपापल्या दिव्यंगत्वाची फेरपडताळणी मुंबईतील जे. जे. किंवा जी.एम.सी. रुग्णालयात करावी लागणार आहे. याशिवाय राज्याच्या आरोग्य परिमंडळांच्या क्षेत्रातील रुग्णालयांचाही आणखी पर्याय असणार आहे. त्यामुळे ही फेरपडताळणी पूर्ण झाल्याशिवाय एकाही दिव्यांग शिक्षकाला जिल्हांतर्गत बदलीतून सूट मिळणार नसल्याचे स्पष्ट झाले आहे. 

याबाबत पुणे जिल्हा परिषदेचे मुख्य कार्यकारी अधिकारी गजानन पाटील यांनी जिल्ह्यातील सर्व पंचायत समित्यांच्या गट विकास अधिकाऱ्यांना (बीडीओ) आदेश दिला आहे. केवळ शिक्षकच नव्हे तर, जिल्हा परिषदेच्या सेवेत असलेल्या सर्व दिव्यांग कर्मचाऱ्यांच्या दिव्यंगत्वाची फेरपडताळणी करण्यात यावी. यासाठी संबंधित शिक्षक व कर्मचाऱ्यांना कळविण्यात यावे आणि एकही दिव्यांग कर्मचारी या फेरपडताळणीतून सुटणार नाही, याची दक्षता घ्यावी, असे गजानन पाटील यांनी त्यांच्या आदेशात नमूद केले आहे.

याआधी ही फेरपडताळणी करण्याबाबत पुण्यातील ससून सर्वोपचार रुग्णालयाला कळविण्यात आले होते. परंतु ससून रुग्णालयाने यास अपुऱ्या मनुष्यबळाचे कारण देत, स्पष्ट नकार दिला होता. तसे ससून रुग्णालयाचे वैद्यकीय अधीक्षक डॉ.यल्लप्पा जाधव यांनी पुणे जिल्हा परिषदेला पत्राद्वारे कळविले होते. शिवाय या दिव्यांग शिक्षकांच्या दिव्यंगत्वाची फेरपडताळणी ही मुंबईतील जे. जे. ‌रुग्णालयात करण्याचा सल्ला डॉ.जाधव यांनी पुणे जिल्हा परिषदेला दिला होता. यामुळे आंतरजिल्हा बदलीतून सूट मिळण्यासाठी अर्ज केलेल्या दिव्यांग शिक्षकांच्या बदल्यांबाबत प्रश्नचिन्ह निर्माण झाले होते. परंतु, आता या आदेशानुसार दिव्यंगत्वाची फेरपडताळणी पूर्ण झाल्याशिवाय बदलीतून सूट मिळणार नसल्याचे स्पष्ट झाले आहे. 

जिल्हा परिषदेतील काही शिक्षकांनी जिल्हांतर्गत बदलीतून सूट मिळण्यासाठी दिव्यांग प्रमाणपत्र सादर केले आहे. मात्र यापैकी अनेक दिव्यांग प्रमाणपत्रे ही बोगस असल्याबाबच्या तक्रारी जिल्ह्यातील विविध दिव्यांग संघटनांनी जिल्हा परिषदेकडे केल्या होत्या. या तक्रारींची मुख्य कार्यकारी अधिकारी गजानन पाटील यांनी गंभीर दखल घेतली होती‌ आणि यानुसार शिक्षकांच्या दिव्यंगत्वाची फेरपडताळणी करण्याचा आदेश दिला होता. या आदेशानुसार जिल्हा शिक्षणाधिकारी (प्राथमिक) संजय नाईकडे यांनी याबाबत ससून रुग्णालयाला पत्र पाठविले होते. या पत्रासोबत जिल्ह्यातील ४०९ दिव्यांग शिक्षकांची यादी देण्यात आली होती. जिल्हा शिक्षणाधिकारी नाईकडे यांच्या या  पत्राच्या अनुषंगाने ससून सर्वोपचार रुग्णालयाचे वैद्यकीय अधीक्षक डॉ. यल्लप्पा जाधव यांनी हे पत्र दिले होते.

दरम्यान, ग्रामराज्य मराठी न्यूज पोर्टलने, 'खरंच, पुणे झेडपीचे तब्बल ४०९ गुरूजी मुके,बहिरे,आंधळे, लुळे अन् खुळे आहेत का?' या शीर्षकाखाली दि.२१ जून २०२५ रोजी याबाबतचे वृत्त प्रसिध्द केले होते. पुणे जिल्हा परिषदेच्या शाळांमधील तब्बल ४०९ गुरूजी दिव्यांग कसे?, खरंच एवढ्या मोठ्या संख्येने जिल्हा परिषदेच्या शाळांवर दिव्यांग गुरुजी कार्यरत आहेत का, असा प्रश्न खुद्द मुख्य कार्यकारी अधिकारी (सीईओ) गजानन पाटील यांनाही पडला होता. यामुळे बदली टाळण्यासाठी सादर केलेली शिक्षकांची आणि त्यांच्या जवळच्या नातेवाईकांच्या दिव्यांग प्रमाणपत्रांची फेरतपासणी करा, असा आदेश सीईओ गजानन पाटील यांनी दिला होता. 

राज्याच्या ग्रामविकास विभागाने दि. १८ जून २०२४ रोजी जिल्हा परिषद शिक्षकांच्या जिल्हांतर्गत बदल्यांसाठी सुधारित बदली धोरण जाहीर केले आहे. या धोरणानुसार शिक्षकांच्या जिल्हांतर्गत बदल्यांसाठी विविध संवर्ग निर्माण केले आहेत. यापैकी विशेष संवर्ग भाग एक हा बदलीतून सुट मिळण्यासाठी पात्र ठरणाऱ्या शिक्षकांचा आहे. या संवर्गात दिव्यांग आणि दुर्धर आजाराने बाधीत असलेल्या शिक्षकांचा समावेश आहे. त्यामुळे या संवर्गात बसण्याची बोगस दिव्यांग प्रमाणपत्र मिळविले असल्याचा आरोप करण्यात आला आहे